今朝起身食完早餐之後就 check-out ，然後就行去北口 o 既 Super City Hotel 放低 o 的行李就出發去秋葉原，第一站我 o 地就去 o 左交通博物館。交通博物館展示 o 左好多火車 o 既模型及實體，而且仲有得玩模擬火車遊戲，而 2 樓至 4 樓分別都有車、飛機及船 o 既展示館，好得意，係一個幾豐富 o 既博物館。行完博物館之後，我 o 地就去 o 左秋葉原行，因為落雨，攪到對腳濕晒，冇晒心機行。我 o 地去 o 左一 o 的扭蛋同食玩舖行，但係就搵唔到之前朋友話有間賣舊 sanrio 精品 o 既地方，所以都幾失望。行完之後我 o 地就係車站附近 o 既天丼食飯，真係又平又好食。

離開道具街之後，我 o 地就出發去上野，到達上野之後我 o 地就行阿美橫丁，因為落雨所以冇乜人， o 的海鮮舖都好冷清，我 o 地去 o 左二木之果子買 o 左 o 的手信，然後就去多慶屋行 o 下。行完之後，我 o 地就行去仲御徙町站搭車去人形町，人形町 o 既特別之處就係甘酒橫丁，甘酒橫町係一個好舒服 o 既休閒區，而且 o 的店舖都幾古舊，好有下町傳統 feel ，我 o 地去 o 左雙葉食佢 o 既豆腐、豆腐布丁同冬甩，個冬甩真係好好食，只係 100yen ，另外個布丁亦好香豆腐味，簡直係 yummy yummy ，最特別係個豆腐，我從來未試過食豆腐食到好似食肉咁，我終於試到喇，難怪食齋 o 既人或者和尚都好少食用黃豆做 o 既齋啦，原來真係好似食緊肉，有陣肉味。做到食豆腐好似食肉咁，係要好足料，唔係光靠石灰粉凝固 o 架！因為落雨，食完小食之後我 o 地就行 o 左一陣，跟住就離開 o 左人形町。