2003關西賞櫻之旅

JR大阪站 > 地鐵御堂筋線至心齋橋站 > 地鐵長堀綠見地線至門真南站(¥310) > 步行5mins至Blosoom Outlet > 地鐵長堀綠見地線至心齋橋站(¥270) > 地鐵御堂筋線至JR大阪站(¥230)

今日行程好輕鬆，首先就係大阪站附近大型百貨公司同地下街行，shopping一輪滿載而歸然後就去o左Hep-Navio間家族亭食lunch，個set真係幾正，好味而且又飽。之後就搭地鐵去門真南站o既Blosoom Outlet行，Blosoom Outlet仲細o的o的，比較多o的運動牌子，不過就唔係太吸引，唯一吸引我o地o既都係Mont-bell，係Mont-bell買o左兩個袋之後就離開。原本諗住去大阪造幣局賞櫻，但因為落雨所以迫住放棄，咁唯有我o地就搭返地鐵去心齋橋作最後衝刺，去買agnes-b啦，¥100店掃貨，去百貨公司買平o既剌身啦，原來諗住去食一間好出名o既手打烏冬，但係原來收5點，唯有搭車返去大阪站阪急地下街附近搵食，食完晚餐之後就返酒店執行李然後休息。

JR大阪站 > JR關空快速至關西空港站(¥1,160) > 香港國際機場

今日係好唔開心，因為要離開日本喇！今朝早6點已經起身，執拾細軟之後再食少少o野就出門，但係去到火車站買完飛先知自己睇差o左時刻表，即刻急忙上月台，但因為上班人潮胸湧，阻住我o地o既去路，原本應該上到車，但眼白白睇住架關空快速走o左，跟住我o地就好似傻佬同傻婆咁企佢人多擠迫o既月台等o左半個鐘到8:03先搭到下一班車，真係激死。上到車之後就好急，直至9:30先到機場，跟住我o地就以9秒9o既速度飛去check-in，check-in完之後就用埋剩返唔夠一個鐘o既時間去做o的我o地未完成o既o野─就係買手信，我o地唔理三七二十一，見到就買，買o左好多o野食，好在都趕得切，跟住我o地就上機，上到機個心仲跳得好厲害，所以奉勸各位都係要早o的出門口，雖然我係第一次咁遲，但係一次都已經夠喇！

上到飛機只係得50多人，今日係公眾假期最後一日喎，都咁少人！唉！肺炎真係可怕過金融風暴。大約1:30就到香港，今次賞櫻之旅就到此為止，但係我已經開始想念日本喇，因為係日本空氣好，我又冇頭痛同鼻敏感，而且實在太舒服喇！