2003關西賞櫻之旅

JR崗山站 > JR山陽新幹線至JR新大阪站(指定席，JR Pass) > JR特急Ocean Arrow至JR和歌山站(指定席，JR Pass) > 巴士至和歌山城 (¥220)

成晚o訓得唔好，到今朝6:32分左右就到岡山，跟住就轉車去JR新神戶站，因為我又係要去買便當，新神戶有一個八爪魚便當同一個肥魚型便當好靚，不過到最後只買到八爪魚便當，而我就再買o左份三文治同咖啡就搭車返新大阪站，去到新大阪站我o地就轉特急列車去和歌山。到o左和歌山站之後，我o地就搭巴士去和歌山城，和歌山城可以遠眺太平洋，以景觀o黎講和歌山城比其他城優勝。

巴士至和歌山站(¥220) > JR至JR白濱站(指定席，JR Pass) > 免費巴士至湯崎館 > 明光巴士(新湯崎•三段壁行)至三段壁 (¥160) > 步行10分鐘至千疊敷 > 明光巴士至新湯崎 (¥150) > 步行5分鐘至崎之湯 > 步行5分鐘至湯崎館

參觀完和歌山城後，我o地又再搭特急列車去白濱，車程又要1個多鐘頭，我o地就順便休息一陣。到o左白濱站之後，我o地就係車站o羅o左好多景點o既優惠卷，然後就搭免費車去湯崎館，大約半個鐘就到，去到有個光光地頭o既叔叔好熱情咁招呼我o地上房，我o地放低o的行李飲啖茶之後就出去搵食然後就去三段壁，去到三段壁我o地就俾每人¥1,100入去洞窟參觀，雖然好快就睇完，但係入到洞窟睇到o的浪真係好勁都值得o既，參觀完之後就出返去影相然後就行o下o的店舖，發覺有梅子o者喱，仲要¥1,000三袋，所以我o地就買o左三袋，雖然o的梅已經唔酸，但係就好好味，真係抵。跟住我o地就搭車去千疊敷睇o下o的怪石然後就返旅館，返到旅館4點多，所以決定去崎之湯露天無料溫泉，去到見到個個都係赤裸裸望住個海浸溫泉，雖然得三個人我都掙扎o左好耐先決定入去，始終唔係好慣，落到溫泉發覺溫泉水可能太天然，熱到不得了，所以我浸o左10分鐘左右就起身，試過已經好夠，不過望住個海浸真係好正。浸完之後就返旅館繼續浸，因為今日只出租o左三間房，全館只有兩個女仔，我去浸o既時候只有我一個，真係好free，浸完之後大約6點就返房食晚餐，只可用一個字去形容晚餐─正！食完休息o左一陣我o地又去浸過，總之全館o既溫泉都試過晒，務求浸夠本，浸完之後我o地就休息喇！