2003關西賞櫻之旅

JR大阪站 > JR京都線至JR新大阪站(自由席，JR Pass) > JR東海道新幹線至JR名古屋站(指定席，JR Pass) > 地鐵至市役所站(¥230) > 名古屋城 > 地鐵至JR名古屋站(¥230)

今日一早check-out完就搭新幹線去名古屋，落車之後就去搭地鐵去名古屋城，名古屋城係需要大家行一段小山上去，真係好似攻城咁，入場費¥350，但係比起大阪城仲似一個城，都唔錯。參觀完名古屋城，我o地行返落去名城公園，見到有個動物園就順便入去行o下，見到隻好頹廢o既黑熊(所以唔駛去北海道先有「熊出沒注意」)，之後我o地就搭返地鐵去名古屋站，訂o左去東京o既飛就去醫肚，我o地見到有條食街就行落去睇o下有乜食，經過考慮就入o左間有好多人食緊蕎麥麵o既食店，叫Yabu，叫o左兩客定食，個蕎麥麵真係好好食，又爽又彈牙，係我食咁多次最好食o既，跟住個玉子飯又係好正，食完真係好滿足，不過較難頂係佢o地會將蕎麥麵o既豉油加埋o的煮麵湯一齊飲，我就唔係咁慣喇。

JR名古屋站 > JR東海道新幹線至JR東京站(指定席，JR Pass) > JR山手線至JR新橋站(自由席，JR Pass) > YURIKAMOME 無人駕駛列車至青海站 (1日pass，¥800) > 台場海濱公園站 (1日pass)

食完飯之後就行o左車站一陣跟住就搭車去東京，其實去東京主要係去台場同blue label專門店，因為上年冇同男友去，而且我又想去，加上要買blue label，所以就好白痴咁山長水遠去東京喇，所以大家唔好學我呀！到o左東京之後就立刻轉山手線去JR新橋站，然後轉Yurikamone無人駕駛列車去青海，到o左台場海濱公園站之後先發覺有一條天橋可以直達青海站，可以慳返唔少車費。我o地去到青海站之後第一時間係去Blue Label 買o野啦，買完o野之後就行Venus Fort，真係好靚好多好正o既舖頭。行完Venus Fort之後我o地就去o左隔離o既Mega Web、Toyota行。跟住我o地就搭返車去Decks行台場小香港同台場一丁目街。我其實真係幾佩服日本人，只要佢o地喜歡o既o野下至米上至整個香港都可以整博物館及建一條街來紀念，台場小香港亦不例外，入面都有幾多香港食品，不過當然唔平啦！至於台場一丁目街就較吸引我，因為好有特色，好多好特別o既o野賣，佈置亦好靚，比起幾年前，Decks由冇人行變成而家好有特色，多o左好多人行。跟住我o地就去o左係Decks隔離o既Aqua City行可口可樂館，入面真係好多可口可樂o既Products，我o地仲買o左個有Qoo頭做蓋o既飲品添！然後我o地就落返3/F行o下，發現有Godiva，咁就唔埋咁多入去買佢o既雪糕，因為上年o黎o既時候食過真係好好食，所以今次一定要再買，佢有4種味，今次我o地揀o左最貴o既Milk Chocolate 味(¥1,200)，其餘3種咪都係¥1,000，真係好好味，而我4隻味都試過，因為香港買唔到，所以大家有機會一定要試o下。行到咁上下，我o地就返去Deckso既和幸食豬排飯，上年一試難忘，今年決定再試，對住彩虹橋食真係唔錯。

台場海濱公園站 > JR新橋站(1日pass) > JR山手線至JR東京站(自由席，JR Pass) > 寢台特急Sunrise Express至JR崗山站(普通車指定席，JR Pass)

食完飯之後就趕車返東京站搭22:00開o既Sunrise Express寢台列車，一上到車出乎我意料之外，因為普通席都有床o訓，真係好開心。我o地整埋完行裝之後就享用Godiva雪糕，跟住我o地就o訓覺，但係成晚都o訓唔好，因為我o地係o訓下層，而床下面就係火車機件，成張床搞到好熱,熱到o訓唔到覺，所以大家如果有機會book此車，一定要同售票員講要上層位(C或D席)呀！