2003關西賞櫻之旅

酒店 > 步行10mins至東本願寺 > 市營巴士205號至梅小路蒸氣機關車館(¥220)

今日行程唔係太趕，所以o訓到8點幾先起身，食完東橫INN例牌飯團後，就出發行去烏丸七'條'搭車去梅小路蒸氣機關車館(其實由酒店行去都唔係近，不過想慳返¥440，大約15分鐘就行到東本願寺，原來東本願寺真係好大，橫掂經過咁就入去行o下影o下相就走。跟住就搭車去梅小路蒸氣機關車館，去到都係得我o地兩個人，買o左飛之後就開始參觀，我o地兩個都係自從?過日本就開始鍾意火車同收藏火車，所以係博物館見到好多火車，特別係蒸氣火車就好開心，館內真係好多火車，有o的火車可以上車頭玩，真係好壯觀，另外館內有一架巡遊火車會定時開，不過要另外加¥400先有得坐。博物館唔只展覽，館外更是維修廠，火車停泊處，可以睇到維修員點樣維修蒸氣火車都幾特別。

梅小路公園前站 > 市營巴士208號至JR京都站(¥220) > JR東海遁本線(京都線)至JR山崎站(JR Pass)

參觀完博物館之後，我o地就搭巴士返京都站，跟住就去我o地o既下一站─山崎蒸餾廠，山崎蒸餾廠主要係亞洲唯一一所可以生產到世界級水平Whisky o既地方，我o地都係香港睇雜誌介紹，所以都想去一去。其實去參觀山崎蒸餾廠最好預先打電話申請，不過我o地冇做到，因為唔識講日文。去到蒸餾廠門口已經見到Counter有幾個靚女歡迎我o地，我o地就同佢o地講話想「見學」，咁佢同我o地預約o左12:00o個場，跟住帶o左我o地入去佢o地個陳列室等，陳列室放o左好多山崎出o既酒，好壯觀！到o左見學o既時間，有位木內小姐出o黎歡迎我o地，原來得我o地兩個「見學」，我o地同佢講我o地唔識日文，佢都話佢識小小英文，加埋個手寫板就開始我o地o既「見學」之旅，第一站我o地就去o左睇佢o地用o既麥、處理麥o既過程，跟住又俾我o地試o下o的麥。跟住我o地就去到佢o地蒸餾o既過程，睇o下乜o野係新酒同完成蒸餾o既酒。然後就去到發酵工場，跟住就到貯酒o既地方，睇到好多酒筒，連山崎第一年出產o既酒都見到，睇完之後我o地就去今次「見學」o既重頭戲─試飲山崎12年whisky，係試酒室木內小姐淨係服侍我o地兩個，有小食，有山崎出品o既飲品任試，真係好正。總括而言，今次「見學」好新奇，全程木內小姐笑容非常燦爛，值得我o地香港人學習。

JR山崎站 > JR東海遁本線(琵琶湖線)至JR近江八幡站(JR Pass)

跟住我o地就出發去近江八幡，今日主要係去睇八幡祭。八幡祭係每年4月14及15日舉行，其實尋晚已經想睇，不過唔夠時間，所以今日先去睇，而今趟主要係睇下午4:00o既太鼓祭，我o地去到大約2點幾，所以去醫肚，跟住先發覺佔99%舖頭關門大吉，總動員準備大祭典，乜o野近江牛，乜o野雜誌推介食店，全部消聲匿跡，好難先搵到一間食店開門，但係菜牌上o既o野就冇晒，只係可以叫o的好簡單o既麵，我o地是但叫o左兩碗麵，但係完全係好似食公仔麵咁，好難食，但係要¥500，好唔值！食完o野之後我o地就去o左行八幡堀一帶，係櫻花襯托下真係好靚。行完都差唔多4點，我o地就返去八幡宮迎接祭典，大約4點半，我o地就見到好多人搬住鼓浩浩蕩蕩想入八幡宮，o的鼓真係好大，要好多人先搬得到，個個男人都飲o左酒醉醺醺咁，一路搬一路搖來搖去，好搞笑。係八幡宮會有人擋住佢o地衝入去，要佢o地用力衝入去就得，第一個鼓好難先衝入去八幡宮，跟住入到去主持面前就拋起個鼓，真係好大力呀！成個祭典都幾得意，又有外國人參與抬鼓，真係好有意義。

JR近江八幡站 > JR東海遁本線(京都線)至JR大阪站

睇到差唔多5點半，仍然仲有好多鼓未攻入八幡宮，我o地就決定o左走喇，跟住就返o左大阪，係大阪站附近o既Yodobashi Umeda、阪急17番街同3番街行o左一陣，又去supermarket買o左長腳蟹就返Hotel Kinki休息。我o地訂o左一間和式二人房，不過都幾細，而且個廁所都幾舊，去水位又會湧o的水出o黎，感覺唔係咁好，不過平就冇計啦！