2003關西賞櫻之旅

JR大阪站 > JR東海道新幹線至JR京都站(指定席，JR Pass) > JR山陰本線至JR嵯峨嵐山站(自由席，JR Pass) > 嵯峨野觀光小火車至龜崗站(25mins，¥600) > 步行約10mins至JR馬堀站 > JR山陰本線至JR嵯峨嵐山站(自由席，JR Pass) > 步行約 20 mins至渡月橋、天龍寺

今朝一早就起身出發去京都，到o左京都站之後就趕JR山陰本線去JR嵯峨嵐山站，跟住就搭9:28開o既嵯峨野小火車，沿途風景真係好靚，個車長又好識搞氣氛，又唱歌，雖然我唔識聽，但係見成車o的人笑就知，跟住又有o的姐姐o黎幫你影相，之後包裝好賣返俾你，盛惠¥1,000，不過為留念我都有買到，25分鐘之後我o地去到龜岡站就完結小火車之旅。跟住我o地就行去JR馬堀站，其實唔係好遠，沿途睇o下風景，吸o下新鮮空氣，好快就到，之後我o地就返去JR嵯峨嵐山站行o下，我o地去o左渡月橋同附近公園，仍然有好多櫻花，真係好靚，成個公園都係櫻花，好似拍緊戲咁。沿途我o地又試o左綠茶串燒及豆腐雪糕，真係好好食，豆腐雪糕好有口感，可以食到一粒粒豆腐，好得意。之後我o地就去天龍寺參觀，參觀完之後就係返渡月橋至天龍寺o既街搵食，沿途有好多食店，好多間都有以豆腐為主o既定食，豐儉由人，我o地就揀o左一間比較平o既食店，冇乜裝潢，入面差唔多全部服務員都係老人家，我o地叫o左兩客定食，一客湯鍋豆腐定食，另一客田園定食，o的豆腐真係好滑好正，埋單都只不過係¥1,400。

天龍寺 > 步行約20mins至JR嵯峨嵐山站 > JR山陰本線至JR京都站(自由席，JR Pass) > 市營巴士205號至金閣寺 (1日pass，¥500) > 市營巴士204號至銀閣寺(1日pass) > 哲學之道 > 市營巴士5號至八'阪'神社(1日pass) > 圓山公園 > 市營巴士5號至烏丸五'條'東橫Inn(1日pass) > 市營巴士5號至烏丸四'條'(1日pass) > 市營巴士5號至烏丸五'條'東橫Inn (1日pass)

食完飯後我o地就返去車站搭車返京都站，跟住買o左一日乘車卷後就搭車去金閣寺，金閣寺o既入場卷係一道符，好特別。金閣寺真係好金碧輝煌，不過好快就行完。之後我o地就搭車去銀閣寺，銀閣寺入場卷都係一道符，而銀閣寺真係好舊，冇乜修飾。去完銀閣寺我o地就開始行哲學之道。上年就死寂一遍，今年就完全唔同，好多好靚o既櫻花，我頓時目瞪口呆，因為太靚太壯觀喇！我o地由頭行到落尾，不停影相，所以行o左成個鐘。跟住我o地就搭車返去街行o下，然後就一直去圓山公園，睇夜櫻o既人都幾多，飲酒又有，食o野又有，幾正，我o地行o左一陣就經八'阪'神社行四'條'通(夜晚八'阪'神社係好靚)，我o地行o左一陣就去烏丸五'條'東橫Inn check-in，因為冇print地圖，黑漆漆又唔係好識行，咁就問人啦，問o左個阿叔，俾佢點到無雷公咁遠，行行o下唔對路，就唯有問個踩緊單車o既靚女，佢幫我o地打電話問酒店位置，又帶我o地去，真係好多謝佢！去到酒店放低晒o的o野就搭車去烏丸四'條'附近搵食，原本諗住去近江八幡睇夜晚o既八幡火祭，因為之前浪費o左好多時間而且又夜又累所以擱置o左，太可惜喇！我o地係四'條'通行o左一陣就係松屋食飯，食完就返酒店休息。