Make your own free website on Tripod.com

2003關西賞櫻之旅

2003413日 (星期日) 晴天 大阪 > 廣島城 > 平和紀念公園 > 廣島燒薄餅村 > 宮島嚴島神社 > 大阪

大阪 > JR京都線至JR新大阪站(自由席,JR Pass) > JR山陽新幹線至JR岡山站(指定席,JR Pass)

今日一朝早食完酒店o既Buffet早餐就出發去廣島,不過我唔係去廣島先,而係去崗山站,因為我為o左買Hello Kitty便當,我其實唔係鍾意Hello Kitty,不過上網睇介紹便當o既網站覺得幾得意,橫掂都經過咪落車買囉!去到崗山站只係買到其中一個,另外一款已經冇o左,然後就趕下班車去廣島。

JR山陽新幹線至JR廣島站(指定席JR Pass) > 廣島電車至紙屋町站 (14mins,¥120) > 步行9 mins至廣島城 (入園費¥320) > 步行15mins至平和紀念公園 > 原爆遺址 > 平和紀念資料館(入場費¥50)

到o左廣島站之後就搭廣島電鐵到紙屋町西,然後經過地下街大約行10分鐘就到o左廣島城,雖然廣島城唔係太宏偉,但係都值得一到,我o地沿途進城o既時候見到有好多小朋友換戰衣,到我o地離開城之後再經過佢o地已經開始比賽劍道,非常精彩,我o地都欣賞o左好耐先走。離開廣島城後,我o地又沿住地下街行去平和紀念公園,雖然路程都要十多分鐘,但係地下街好多o野睇,所以唔覺得行o左好耐。到o左公園前,第一樣見到o既就係原爆遺址,都真係炸到幾爛,影o左張相之後我o地就行去平和紀念資料館,資料館雖然只收¥50,但係館內內容絕無欺場,資料詳盡,遺物豐富,而且更觸動人心,所以我本人覺得我去過咁多資料館,此館真係令我非常難忘。

步行15mins至廣島燒薄餅村 > 步行至八丁堀站 > 廣島電車至JR廣島站(7 mins,¥120)

跟住我o地就去今日廣島重頭戲─廣島燒餅。食廣島燒餅當然要去廣島燒餅村啦,我o地行o左差唔多20分鐘先到,跟住二話不說上o左二樓,然後揀o左一間叫八昌o既舖頭,因唔識日文,就叫頭兩個最貴o既o野食,原來最貴o個個係有蝦,麵低可以揀烏冬或麵,我o地兩個人當然一人試一個啦,老板娘係我o地面前大洒一輪功夫之後我o地就開始食,真係非常非常之好食,兩隻麵底都好正,我都而家都仲好懷念呀,相對大阪燒餅,我本人鍾意廣島燒,因大阪燒就重蛋漿,而廣島燒重料,個外皮係薄薄一層蛋皮,口感正好多!

JR廣島站 > JR山陽本線至JR宮島口站(自由席26mins,JR Pass) > 步行至「JR觀光船碼頭(10mins) > 「JR觀光船至宮島碼頭(10mins)

食飽飽(真係好飽,可以唔駛食飯)3點幾,我o地就出發去宮島,大約半個鐘就去到宮島,跟住就坐船去宮島口,離開碼頭之後就見到好多鹿,o的人餵鹿餵都好狼狽,o的鹿圍住唔俾佢o地走,真係好慘。之後我o地就步入表參道商店街,跟住唔開心o既事就發生o左,就係見到大鳥居俾o的木棚圍住睇唔到,好傷心呀!不過我o地都繼續去都嚴島神社附近行,行完之後就去返表參道商業街睇o下手信同埋食蠔,我本身唔食蠔,但係係我男朋友推薦下試o左一隻,雖然我都係頂唔住陣味,但係又真係好新鮮,好清甜,值得一試!食完蠔行o左一陣就去o左買旅遊書推薦o既柚子醬油跟住就上船返廣島,再轉新幹線返大阪,之後就係大阪行o左一陣買o的布丁返酒店休息喇!

宮島碼頭 > 「JR觀光船至「JR觀光船」碼頭(10mins) > 步行至JR宮島口站(10mins) > JR山陽本線至JR廣島站(自由席26mins,JR Pass) > JR山陽新幹線至JR新大阪站(指定席,JR Pass) > JR京都線至JR大阪站(自由席,JR Pass)

食完蠔行o左一陣就上船返JR宮島口站,轉乘JR山陽本線返JR廣島站,再轉新幹線返大阪,之後就係大阪行o左一陣買o的布丁返酒店休息喇!