今朝一起身，我o地當然再浸一浸溫泉，浸完之後我o地就落o左去地下食早餐，雖然唔係好似其他旅館咁係有懷石料理o既早餐，但係個buffet o的食物都好好味，我最鍾意食魚，日本o的魚真係好鮮甜，好有魚味。食完之後我o地就去check out，然後就去飲杯咖啡休息o下就去車站附近便利店買o左佢o地自家製o既大福同梅子酒o者哩，好好食呀，好過係東京買o個o的！

磐梯熱海站 > JR磐梯熱海線至郡山站(JR Pass) > JR東北新幹線至東京站(JR Pass) > JR橫須賀線至鎌倉(JR Pass)

由磐梯熱海乘車到達東京後，我o地立刻轉車去鐮倉，經過大約1小時左右就到鎌倉，因為今日係星期日，所以有好多人，一出站之後我o地就沿人潮行去八幡宮，中途我o地就係一間食咖哩o既小店食飯，佢係成條街最平但好好味。大約10-15分鐘我o地就到達八幡宮，八幡宮係免費，但佢有一個文物歷史展覽地方就要入場費100 yen。之後我o地地沿地下及地面指示行去鎌倉宮，好遠而且冇乜特別。

鎌倉 > 小田急江之島線至長谷站(190 yen) > 高德院鎌倉大佛(步行約7分鐘) > 湘南海岸(車站步行約5分鐘)

沿路行返去鎌倉站再去搭小田急江之島線到長谷站，出站之後轉右沿直路就可以去高德院，參觀大佛係需要200 yen入場費，雖然大佛唔係好高，冇我o地香港同中國咁宏偉，但睇o下都好，如要到大佛內參觀就加20 yen。參觀完之後，我o地就沿路經過車站再直去湘南海岸，海岸好長，可遠眺富士山，但可惜當日比較太霧所以睇唔到！

長谷站 > 小田急江之島線至鎌倉(190 yen) > JR橫須賀線至橫濱站(JR Pass) > JR橫濱線至新橫濱站 (JR Pass) > 新橫濱拉麵博物館(步行約10-15分鐘)

行完晒所有想去o既地方就搭車返鎌倉站，然後再去新橫濱o既拉麵博物館，出o左新橫濱站之後就沿路行去拉麵博物館，入場費為300 yen，博物館內資料相當豐富有趣，佈置亦相當有味道，真係值得一去，真佩服日本人，佢o地會將自己日常生活喜歡食玩o既o野建一個博物館。入到拉麵博物館當然要食拉麵啦，不過都唔平o架！不過受歡迎o既拉麵店都好多人排隊，要排成個鐘，所以都係冇排，而我o地就去o左一間係定期會換o既拉麵店，今期係八戶麵道大陸，我o地分別叫o左950 yen及1,100 yen o既拉麵，味道同口感都ok啦！但比起大阪神座及金龍就冇乜特別喇！

新橫濱站 > JR東海道新幹線至東京站(JR Pass) > 山手線至巢鴨站(JR Pass) > 東京小套房(步行約10分鐘)

食完拉麵之後我o地就返新橫濱站，然後搭最後一程新幹線返東京(因JR Pass今日到期)，真係好唔捨得，實在太方便喇！經過15分鐘，我o地就返到東京站，跟住我o地就轉山手線返巢鴨然後再返民宿，check in 之後我o地就上房，間房唔錯，可o訓3個人 ，而且又有獨立廚房及廁所，廚房位置亦有半間房咁大，可以放旅行箱，係呢度就可以體驗到日本人平時o既生活環境。