2002日本之旅

2002年5月24日 (星期五)

晴天

東京 > 郡山 > 磐梯熱海溫泉 > 五色沼 > 紅葉館溫泉

東京站 > 山手線至巢鴨站(JR Pass) > 步行至東京小套房(約10分鐘) > 山手線上野站(JR Pass) > JR東北新幹線至郡山站(JR Pass)

其實夜行巴士都幾舒服，巴士都好穩定好快，不過一晚停幾個站都會叫你去廁所，所以會醒，唔係咁好，所以我下次都會試o下搭火車。大約朝早7:00左右我o地就到達東京站，之後就去東京小套房放低o的行李係林小姐度就去上野，食過早餐就搭 9:06a.m. JR東北新幹線至郡山，皇天不負有心人，我o地係新幹線上面終於見到有我想買o個條電話繩賣，所以立刻買o左，真係好開心。

郡山站 > JR磐梯西線至磐梯熱海站(JR Pass) > 紅葉館旅館(步行約3分鐘)

到達郡山站之後我o地就轉車到磐梯熱海站再到車站附近o既紅葉館旅館，放低o左個背囊之後，再出去係兩間超市及便利店行o下，再等車去豬苗代，磐梯熱海這地方真係好鄉下，火車都係差唔多一個鐘先得一班，但係我o地都好鍾意呢度，環境空氣好，又寧靜，而且坐火車時有一種置身於日本劇集同漫畫鄉郊o既環境內o既感覺。

磐梯熱海站 > 豬苗代站(JR Pass) > 乘巴士至磐梯高原站(約半小時 870 yen) > 五色沼 > 五色沼站 > 豬苗代站(約25分鐘 750 yen) > JR磐梯西線往磐梯熱海站(JR Pass) > 紅葉館

我o地去到豬苗代站後就去o左附近一間民宿o既餐館食飯，豬苗代車站附近好大風，冇乜店舖，食店只有三、四間而已，係食店內望返出馬路大風吹起有風沙o既感覺好似置身於美國西部牛仔片中o既荒蕪環境咁，食完飯之後就去等巴士上五色沼(巴士係好耐先有一班，所以一早問o左班次買o左飛先好去食飯)，上o左車大約半小時就去到磐梯高原站，車費係870 yen，落o左車之後我o地就開始行五色沼，第一個沼就係�k六沼，之後會經過柳沼、青沼、弁天沼、深泥沼、赤沼、毘沙門沼等，可能我o地中國o既九寨溝仲靚，不過我未去過所以覺得五色沼非常靚，而且人唔係太多，生態環境保養得好好，大約行o左1個鐘多o的，最後我o地會去到五色沼站，然後我o地就去等車返豬苗代站再返紅葉館。返到紅葉館差唔多5:00，我o地立刻check in然後上房，間房好大好舒服啊，好有feel！我o地沖過涼之後就落去地下浸溫泉，第一次係裸露浸溫泉都唔係好慣，好在得兩個女人同佢o的仔女，不過都好唔自然，但係浸溫泉真係好舒服，浸夠本之後就出去街買o左好多刺身返旅館食，食完之後休食o左一陣，大約9:00左右就係4樓私人風呂浸，浸完用石做o既風呂就去隔離浸用木做o既風呂，浸完就返房�唌C