2002日本之旅

2002年5月23日 (星期四) 晴天 中津 > 京都清水寺 > 八'阪'神社 > 祇園 > 二'條'城 > 哲學之道 > 錦市場 > 大阪夜巴至東京

大阪站 > JR京都線至新大阪站(JR Pass) > JR東海道新幹線至京都站(JR Pass) > 市營巴士206至清水站下車再向山上方向步行約10分鐘至清水寺(市營巴士一日乘車券)

今日係我o地最後一日留係大阪，我o地最後一站就去京都，我o地大約10:03a.m.乘新幹線於15分鐘後到達京都站，出站之後我o地立刻去旅客服務中心啦！o個度o的服務員都幾老，但係英文真係唔錯，然後我o地就立刻去巴士站買張市營巴士一日乘車券，只需500 yen，算起上o黎真係好抵，因為一程巴士都要220 yen。跟住我o地就去o左等260號公車，去到又見一大班學生，我o地等o左足足成三班車先上到，攪到差唔多成11:30先可以落車，春季遠足o既威力可真大哦！到o左站之後我o地就沿山路上清水寺，大約10分鐘左右就到，今日主要見都係日本人為主，香港團只有一團，所以都唔掃興。清水寺入場券係300 yen，入到去當然會係著名地方影相啦，仲有玩o下裝水，四周圍行o下，不過我o地都係等一部份學生走o左我o地先至行去另一度，費事浪費時間。

清水寺 > 清水'阪' > 二年'阪'、三年'阪'、石'屏'小路 > 八'阪'神社

離開清水寺之後，我o地就沿清水'阪'行，沿途有好多售賣紀念品、食物、清水燒o既地方，係全京都較集中o既地方，如果大家要買紀念品就要係度買，因為去其他地方就好難再搵到。行完清水'阪'我o地就轉右落三年'阪'及二年'阪'，呢度相對清水'阪'寧靜，店舖亦相當有特色，建築物古色古香，我o地非常喜歡。沿途我o地亦轉去一o的橫街行o下石'屏'小路，非常有特色，不過可惜就係見唔到舞妓。經過高台寺、圓德寺之後，我o地到達圓山公園，再轉左就到達八'阪'神社，沿途我o地都有問路(confirm一下以免行冤枉路)，值得一讚o既係沿路拉轎o既年青人，佢會叫你坐轎，但係我o地冇坐，我o地唔幫襯佢，相反就問佢路，佢好熱心咁話我o地知，絕對唔會草草了事，真係好好人。終於到o左八'阪'神社，八'阪'神社係免費進入o既，人比較少但舒服。參觀過後，我o地就離開八坂神社，出口對面就係祗園。我o地就係祗園附近落o左一條地下食街搵o野食(不過只得兩間食店)，我o地去o左其中一間，店舖細細只得老板娘一人打理，亦因為較偏僻，所以只有我o地兩個客人，我o地叫o左兩客當日o既set lunch，雖然差唔多係冇肉，但係老板娘好有心機整，冇肉得o黎相當好味，呢樣都係我欣賞日本人o既地方之一！食完之後，我o地就問o下老板娘一澤帆布o既位置，老板娘由木無表情(我o地以為佢好惡)變得笑容滿面，好有心機教我o地，又畫埋地圖，好善良，咁亦表現o左日本人做事o既時候係好認真。

八'阪'神社 > 祗園 > Yojiya面油紙專門店 > 一澤帆布

食完lunch之後，我o地就出沿八'阪'神社對出於祇園o既Yojiya面油紙專門店買面油紙等化妝品，雖然我冇面油，但我買俾朋友，佢o地試過都話質地柔軟及好好用，都有好多日本人買o黎用。買完之後我o地又向返八'阪'神社方向行再左轉返東大路通，行到知恩院前站過少少就見到一澤帆布，一澤帆布固名思義帆布製品最出名而且永久保用，我o地當然都有買啦，真係好堅韌！

祗園 > 二'條'城(車程約15-20分鐘) > 清水'阪'> 哲學之道(約10-15分鐘車程) > 錦市場(約15分鐘車程) > 京都站(約10分鐘車程) > JR東海道新幹線至新大阪站(JR Pass) > 地下鐵御堂筋線至中津站(200 Yen) > 梅田中津東橫Inn > 步行至大阪車站八重洲口(約10分鐘)

買完之後我o地就行返去四条通祗園站，乘坐12號公車前往二'條'城，二'條'城入場券為600 yen，我o地去到尚有半小時就關門，所以急急腳行入去城內，參觀二'條'城都係要脫腳為免古舊o既地板受損，二条'條'城雖然只得一層，又沒有特別歷史文物展出，但係可以欣賞到二'條'城o既建築特色，而每個廳及房地方相當大，但可惜的是二'條'城o既天守閣已經唔存在，我o地只能夠一登遺址而已！參觀完之後我o地就乘坐12號巴士返祗園，再去清水'阪'買返對清水燒同睇睇點o左燈籠o既街，不過去到時間尚早，並未有太多燈籠睇！然後我o地落返東大路通祗園附近等203號車去哲學之道，哲學之道雖然冇乜特別但黃昏時份行就好舒服同非常寧靜，我o地行o左一陣就返去馬路等5號車去四条烏丸附近再行去錦市場。

晚上o既錦市場非常靜同黑，我o地係去搵一間rurubu介紹食懷石料理o既地方，但搵o左好耐都搵唔到，就去到一間舖頭問人，佢o地都唔知係邊，但最後佢幫我o地打電話俾間舖頭問清楚位置再教我o地點去，真係好感動呀！夜晚搵路真係好辛苦同危險o架！幾經辛苦我o地終於都去到虎杖，一去到老板娘都知道我o地係邊個，去到我o地俾本雜誌老板娘睇，佢好開心咁同班店員講有中文雜誌介紹佢o地舖頭，佢o地都好開心，不過rurubu介紹o既1200 yen茶懷石就冇o左喇，每日都有唔同set dinner，不過就唔平，我o地分別叫o左個3,000 yen及4,000 yen o既set，個靚女waitress識講英文，好有溝通，每個菜o黎o既時候都有介紹，好專業，而老板娘好熱情，佢原來都有個autie住係香港觀塘，大家傾o左好耐偈，我仲o羅o左好多老板娘o的名片返o黎派街坊。而個set真係好正，咁貴都係超值，我見佢o的客好多都係熟客，好犀利，老板娘送客o既時候真係90度，對眼係望自己對腳，利害！抵佢o地只係每日下午5:00開門都有咁多客同生存到！食完之後我o地就好急咁搭返5號車去京都站，再搭新幹線返去大阪酒店攞返o的行李(已經係10:00有多)，然後趕去大阪車站搭夜行巴士返東京。