Make your own free website on Tripod.com

2002日本之旅

2002522日 (星期三) 晴天 中津 > 姬路城 > 神戶 > 梅田 > 中津

大阪站 > JR 京都線至新大阪站(JR Pass) > JR山陽新幹線至姬路站(JR Pass) > 姬路城及好古園(步行約15-20分鐘)

今日主要行程係姬路及神戶,所以一早就係酒店食o左少少飯團同飲o左杯coffee就出發。我o地係搭8:56a.m.由新大阪出發o既新幹線列車,大約半小時就到達姬路,去到姬路站之後當然係搵個旅客服務中心啦,估唔到個服務員已經好老咁,但好布禮貌、好幫忙而且英文都唔錯。出站之後我o地就沿馬路一直行,中途見到有一家人係街邊賣菜同生果,我就買o左一盒士多啤梨沿途食,雖然細細粒,但係好甜,而且價錢都ok。大約15分鐘左右我o地就到o左姬路城入口,去姬路城o既路程比起去大阪城天守閣為舒服。
沿途我o地巧遇一班 bb仔同一o的類似老師咁,o的 bb仔係o的石級度爬,似乎係訓練o的bb仔學行路,日本人真係利害,細細個已經咁樣訓練o的bb仔,又唔怕污穢,相反香港o的家長又驚呢樣又怕o個樣,其實香港人真係可以此為借鑒。行o左一陣我o地就到o左售票處,姬路城入場費為600 yen,而連隔離好古園就720 yen(原價900 yen),所以我o地都買o左連好古園o既入場券。
終於我o地去到姬路城,它給我o地o既印象並唔係好似大阪城天守閣咁金碧輝煌,相反係好撲實,每位遊客都要脫掉自己o既鞋,換上專用o既拖鞋,因為城內全保留以前o既木板,非常古舊但令我o地置身於歷史中,我o地又可以一睹以前武士剖腹o既地方,所以我好喜歡姬路城,行完之後,我o地又整多一個姬路城o既紀念幣作為留念。然後我o地就出返去入口轉右行幾分鐘就到好古園,好古園主要係參觀日本o既庭園景色,亦有一o的種植植物、花o既地方,有竹林等,都幾靚,我o地都影o左好多相,另外遊客亦可以以500 yeno既價錢一嘗泡綠茶o既滋味。離開好古園之後,我o地就去o左姬路城對面馬路一o的賣手信o既舖頭,當中不少貸品可供試食,而我o地就買o左一盒價錢630 yen有索繩袋o既黑豆草餅,好好味呀!

姬路站 > JR山陽新幹線至新神戶站(JR Pass) > 北野異人館(步行約20分鐘) > 元町站(步行約10-15分鐘)

離開姬路城之後,因為要去神戶,所以我o地冇行於姬路o既購物街,有點可惜。到o左新神戶站之後,我o地都決定去一去異人館影o下相,其實我o地都冇乜興趣,因為外國人o既o野香港大把啦,不過我o地都想去o下舊中國領事館,不過行到中途有o的後悔,因為又曬又熱,但係要行斜路,到o左異人館附近條斜路仲斜,行到我o地死o下死o下咁,幾經辛苦終於都到o左中國領事館,影完相之後就去風見雞館附近行o下,影o下相就沿直路落山行去元町站附近,路程大約10-15分鐘吧。去到元町附近本來想搵自己上網搵o既幾間神戶牛肉餐廳,不過搵o左好耐,問o左好多人都搵唔到,已經下午3:00,又餓又累o既情況下我o地就揀o左一間於車站附近,都要2,500 yen一客set,不過都ok,幾好味啦,當時全店只得我o地兩個!食完o野之後我o地就行返上新神戶站搭車返大阪,因為神戶冇乜特別地方吸引我o地。

新神戶站 > JR山陽新幹線至新大阪站(JR Pass) > 大阪站(JR Pass)

返到新大阪站之後,我o地係車站附近行o下,買o左一條有得試食o既柚子果凍,740 yen,非常好味!另外我o地係車站下一層o既商店街買o左大阪好出名o既抹茶布丁,840 yen,係上面車站o個層所有店舖都要賣900 yen。之後我o地就返去行梅田,到梅田地下街、Hep Five、三番街等地方,梅田簡直是個購物天堂,地方好大,地下街好似迷宮咁,所以我o地都係搵唔到我o地想去o個間店舖食油豆腐烏龍麵,只係見到有一間小店有得食就入去試o下,味道不錯,凍食味道更濃。之後我o地就返酒店休息,聽日會去京都。