2002日本之旅

2002年5月20日 (星期一) 晴天 新宿 > 大阪 > 大阪城 > 心齋橋 > 梅田中津

新宿 > 中央線快速至東京站(JR Pass) > JR東海道新幹線至新大阪(JR Pass)

今日開始就落大阪搵食喇，所以一早食完早餐就上房攞埋o的行李然後check-out，初時我o地諗住好似其他網友咁放低一件行李o係酒店，到我o地返東京先至攞返，點知酒店話只可以幫我o地留一日咁多，打破晒我o地o的計劃，最後都要拎住兩大件行李去大阪。既然點都要拎，咁我o地就開始行去新宿站，搭中央線快速到東京，然後開始上新幹線，我o地隔o黎坐o左個日本人，開車之後佢用英文問我o地係咪遊客，咁我o地就開始傾偈直至佢係名古屋落車為止，佢叫Ken(健)，佢好好人，我o地傾o左好多o野，而佢又介紹日本o的雪糕好好味，仲係火車上面請我o地食雪糕，又幫我o地plan京都o的景點，去邊個好啦，路線係點啦......仲有佢好忙，都叫我o地返東京時打電話俾佢同我o地一齊去食刺身，當然我o地都係冇搵佢，難得佢咁忙可以休息o下，我o地都唔想阻佢休息，佢o地日本人好多時都係晚上10先放工，冇乜時間放假，不過佢o既熱情實在令人驚嘆，不過返到香港我o地都會保持聯絡。有樣o野我好佩服日本人就係Ken話佢係自己間公司做事達20年之久，佢話好多人都係咁，真係好犀利！

新大阪站 > 地下鐵御堂筋線至中津站(200 Yen) > 梅田中津東橫Inn(步行不需5分鐘)

經過大約3個小時左右，我o地到達o左新大阪站，然後就轉乘地下鐵到中津站，再到梅田中津o既東橫Inn，之前已經係香港以傳真方法訂o左房，雙人房(double bed)係7,620 yen，連稅係8,000 yen，都ok o架，上到房感覺都唔錯，房間明顯比Vintage大啦，地下都夠晒位開兩個旅行箱。，已經好滿意喇！

東橫Inn > 大阪站(步行約10分鐘) > JR大阪環狀線至大阪城公園站(JR Pass) > 大阪城公園天守閣(步行約15分鐘)

放低行李之後，休息o左一陣，我o地就出發向JR大阪站方向行，大約15分鐘左右已經到大阪站，然後乘JR大阪環狀線至大阪城公園。到達公園之後，我o地就向住天守閣o既方向行，都唔近o架！去到天守閣，雖然要600 yen入場費，但因為機會難逢，所以都係買o左入場券入場去！天守閣可以講話係金碧輝煌，但其實經過不斷的修葺，裏面跟本一o的都冇古代特色，不過可以了解o下日本o既歷史！參觀完之後，我o地就係地下㩒o左個紀念幣，要300 yen，而刻字則加30 yen，不過幾有趣，好有紀念價值，可以一試！不過大阪城真係唔去唔可惜！

大阪城公園 > JR環狀線至JR難波站(JR Pass) > 心齋橋(步行約10-15分鐘)

離開大阪城之後，我o地就去心齋橋，其實好多網友都話JR難波站離心齋橋都幾遠，但為o左用多o的JR Pass，所以我o地都試o下行，但係原來都ok，10-15分鐘都行到，而且沿途有地下街，所以唔覺好遠，往後日子都決定係JR難波站行去心齋橋等地不過唯一唔好就係去JR難波站O既車班次較疏。去到心齋橋之後，我o地第一時間就去搵Rurubu(遛遛步)介紹o既大阪愛好燒啦！
我o地揀o左正統派位於道頓堀o既豚兵衛，一坐底我o地都唔知點叫，因為唔識日文，幸好其中一位店員係我o地祖國o既同胞，係由哈爾濱o黎日本o既留學生，所以大家可以用普通話溝通，於是我o地點o左一客豬肉同一客章魚，跟住店員就用好純熟o既手法係我o地面前整餅，之後我o地就開始食，的確好好味呀！

食完之後我o地就開始行心齋橋，一直行到千日前，然後就去o左Tokyo Hands行，然後去o左一間100 yen及99 yen店行，99 yen店種類比100 yen店多，一o的牛奶都係99 yen，值得推薦。行到好累而且都好夜，我o地就行返去道頓堀食神座拉麵，真係好好咪！食完之後我o地就返酒店休息。