2002日本之旅
| 2002年5月19日 (星期日) | 陰天、晴天 | 新宿 > Yokohama Bayside Outlet > 中華街 > 港區未來二十一 > 新宿 |
今日係第一日用JR Pass，心情當然興奮啦！唔駛俾錢就暢通無阻，其實都係自欺欺人，因之前已俾錢買o左個pass，不過o個種感覺係最重要o既！
新宿 > JR湘南新宿橫須賀線至橫濱站(JR
Pass) > JR京葉線至新杉田站(JR
Pass) > 海岸線至鳥濱站(250 Yen)
> Yokohama Bayside Outlet(步行約5-10分鐘)
 |
今日第一站就落橫濱Yokohama Bayside Outlet，我從來都未行過Outlet，今次有機會，所以好興奮。聽講Yokohama Bayside Outlet都幾大，而且名店亦好多，所以都預大半日時間係Outlet。而我o地第一日已經係機場訂o左9:35a.m.特急車票由新宿到橫濱，全程只需30分鐘，好快而且有指定席，保證有位坐，而且車上有紀念品賣，當中有兩款特急及新幹線o既電話繩，而我o地睇中o左其中新幹線o個條，因為有5個車頭比較可愛，都係 880 yen,但係竟然冇晒貨喇！(不過大把搭新幹線機會，一定買到)架車終於係10:05到橫濱，跟住我o地就轉京葉線去新杉田，到o左新杉田之後就出閘一直行去搭無人架駛列車海岸線到鳥濱站，一出鳥濱站，頓時覺得個站好簡單，人又冇，只有幾部自動售票機(真犀利！)。出站之後沿天橋步行便望到Outlet所在地，非常近。到o左Outlet之後發覺真係好大，同香港o個o的所謂Outlet比真係小巫見大巫，之後私o地就立刻去o左factory outlet先啦，因為各名店都集中之此，而且又係係各outlet中最大o既。專程o黎到當然要買返o的o野啦！ | |
| 去到Nike Outlet買o左對波鞋，立即換o左添，因為舊o個對著得幾痛，之後又去o左Mont-bell買o左個多用途袋啦！跟住我o地行行o下就發覺廣場內有好多人排隊唔知做乜，我o地就落去睇，用我o地識睇漢字o既優勢估到每買滿 3,000 yen就有一次抽獎o既機會，我o地自然就有兩之機會，因每樣都超過 3,000 yen。首先我抽先，只係安慰獎，有一張橫濱酒店coupon，基本上冇乜用，但係到我男友抽之後，打開o左俾o的姐姐見到之後佢o地好興奮，而我o地就唔知發生乜事，幾個姐姐立刻走埋o黎叫Chotto matte，又響鐘，好鬼興奮咁，而個個人都望晒過o黎，嚇親我o地，原來係中o左三獎，有兩張 500 yen o既現金券，我o地當然好開心啦，原來每日最多只有60人中三獎o乍！之後我o地當然用o左o的coupon係一間Sam Choy's o既餐廳食o野，因為比較其他餐廳為便宜。食完lunch之後又繼續行，去o左Romatic Garden買我好鍾意o既兔仔精品，然後又繼續行埋其他館。到o左3:00左右就離開，但係仲好開心，日本o既outlet真係唔錯，買o的o野都唔係好殘，好舊，好老土咁，絕對係正啦！ |  |
|
鳥濱 >
海岸線至新杉田(250
Yen) > 京葉線至石川町(JR Pass)
> 中華街(步行約5分鐘)
離開Outlet之後，下一站就係中華街，因為有JR Pass，所以都到一到啦。到o左中華街發覺真係好多人，中華風係日本吹得正濃，滿街都係人，滿街都係大包，成300-400 yen 一個包，貴到飛起，見到o的日本人食义燒包食得好滋味，自己都打冷震，係香港唔到冇得揀o既地步都唔會食包啦！今次一趟，簡直大開眼界，燒鵝，龍蝦，你敢唔敢食。所以我o地都係四周逛逛，影o下相，參觀o下關帝廟就走。
石川町 > 京葉線至櫻木町(JR Pass) > 港區未來二十一
櫻木町係東京台場o既翻版，建築物令人有一種非常現代o既感覺，幾特別，但係因為落雨，所以我o地冇乜點行，只係o係遠處影相，然後入o左Landmark行，跟住見到底層Foodcourt有和幸豬排食喎，而且各位網友極力推薦，就立刻入去食啦！我o地點o左一客黑豚肉定食及一客普通豚肉定食，各1,300及1,150 yen，非常好味，清甜o既蜆肉麵豉湯、菜絲及飯係任添，非常抵，食完真係好飽，藉得一提係，每張枱都有兩支醬油，一支係普通醬油，一支係柚子醬油，柚子o個支拌豬排出奇地唔錯，可以一試。
櫻木町 > 京葉線至橫濱(JR Pass) > JR橫須賀線至新宿(JR Pass)
食完飯後就急急腳返橫濱，再轉特急列車返回新宿，到無印良品買o的零食後返回酒店休息，明天去大阪。