2002日本之旅
| 2002年5月18日(星期六) | 陰天、晴天 | 新宿 > 三鷹之森美術館 >下北澤 > 涉谷 > 新宿 |
| 今朝一早起身，食完早餐之後就出發去三鷹之森美術館，之前已經係香港JTB買o左飛，知道10:00-10:30第一次入場，所以都要急急腳，如果唔係就要到12:00、14:00或16:00先有得入場。到達三鷹站後就立刻向前走，點知原來行錯路，應該係出口轉左先係，所以行行o下唔對路就四週圍問人，好在沿途都有貴人相助，特別係便利店o既店員，我o地都未開聲而佢見我o地揸住份美術館leaflet即刻指我o地向邊個方向行(可能好多人都好似我o地咁行錯路，哈哈)，跟住我o地就用9秒9o既速度趕去，好在俾我o地係最後一刻趕到，真係險過剃頭。 | |
|
|
美術館門口o既職員能操流利普通話，所以好快就可以入去館內，入場前佢會俾張好靚o既入場券你，係宮崎駿動畫o既三格幻燈片，有好多款，而係美術館裏面係唔可以影相，係唯一可惜之處。不過館內真係唔錯，資料豐富，又可以睇到動畫o既製作情況，又可以一睹宮崎駿舊作品、手稿同模擬工作室環境，大開眼界，仲可以睇到由以前播放動畫o既投射器播放o既動畫，雖然唔知o的日文講乜，但係見到好多小朋友睇到好好笑都好開心。參觀到咁上下，我o地就上到3樓，經過貓巴士廣場出去室外，爬上類似雀籠o既塔上去最頂o既天空之城守護神地方影相，然後就去買紀念品，原本係香港已經有目標，但係原來美術館有部份o既紀念品係出o左唔會再出，真掃興。大約12:30我o地就離開美術館了，我o地沿住馬路步行到吉祥寺站。 | |
三鷹之森美術館 >
吉祥寺站 (約20分鐘)
> 京王井之頭線至下北澤 (170
yen)
| 其實今次旅程係東京o既景點我差不多大部份都去過，因為男朋友第一次到日本，所以便重複去過，但係我自己就幾鍾意下北澤，所以去幾多次都唔會厭。一到步就醫肚，我o地就係車站附近o既回轉壽司店食壽司，食完壽司之後就開始行街，下北澤俾我o既感覺唔錯，店舖雖多但行得較舒服，中途我o地見到一間玩具店，一看之下發展我o地想買o既龍貓同天空之城萬年曆，所以就立刻買o左(係打後o既日子我o地都見到好多店舖有美術館o既紀念品賣，而且價錢同美術館一樣，所以唔想俾1,000 yen美術館入場費o既朋友都可以係玩具店買到美術館o既紀念品)。其實下北澤都有好多食o野o既店舖都幾有特色，仲有離車站遠少少o既地方有o的賣pancake o既店舖好多人排隊，但係我o地食壽司食得太飽，所以就無福消受，各位如有機會可以一試。 |  |
下北澤 > 京王井之頭線至涉谷 (120 yen) > 山手線至新宿 (130 yen)
逛完下北澤之後大約6點，所以就去涉谷行o下，順便食飯。到o左涉谷後就開始四圍行，到109 II，01 Young等地行，之後去o左回轉壽司築地本店附近，因為太多人排隊所以我o地去o左對面間舖頭食o左個650 yen o既定食，食完之後就返新宿，係車站附近有間Comma Ca Store開到10點，所以入去行，順便買o左少少o野，之後就返酒店。