Make your own free website on Tripod.com

2002日本之旅

2002531日 (星期五) 晴天 巢鴨 > 成田機場 > 香港

話咁快,我o地o既日本之旅已經係最後一日,其實真係好唔捨得,因為日本實在太吸引喇,要熱鬧有熱鬧,要寧靜有寧靜,絕對係一個好地方。

今朝起身之後就只係o係巢鴨地藏通商店街附近再行o下,去o左高岩寺食o左一串100 yen好多阿婆都買o既串燒米糕(好似串燒三兄弟咁),其實冇乜味,可能因為o的阿婆冇乜牙力,而o的米糕又比較煙筋,所以好多阿婆買啦!行o左一個圈之後,我o地就去返天丼食天婦羅,因為太好味,而且價錢又合理,唔食對唔住自己。食完飯之後我就去返地藏通一間舖頭度買o左杯抹茶軟雪糕食,好好味好大杯,正!

巢鴨 > 山手線至日墓里站(150 yen) > 京成電鐵至成田空港Terminal 2 (1,000 yen)

跟住我o地就返去東京小套房休息一陣,然後就出發去機場,我o地都係去日墓里再轉京成電鐵去機場,雖然要搬行李上落樓梯,但係始終平嘛!去到機場check in之後,我o地就係機場範圍內逛逛,大約4:30左右就入o左閘先,跟住就係閘內o的免稅店行o下,到o左5:00左右就去登機門附近行,發覺一般係機場買o既草餅比淺草雷門o既同價或者係比較貴,但唯一我最鍾意食o既一款草餅就好平,只係620 yen,雷門要賣740 yen,激死我喇,所以我都買多一盒上飛機食。下次我唔會再係雷門買o架喇,大家都記住呀!

到o左5:35,我o地終於都上機,真真正正告別日本了。但係出乎意料之外,架機係唔full,都有幾多位剩,可能世界杯o既關係啦,o的人冇咁早返香港。所以我o地全程都坐得好舒服,而且此回程機型號比去程機新,有獨立電視,可以睇戲同打機,我就又打機又睇Harry Potter喇!係飛機當然又食o左一餐好好咪o既飛機餐,不過已經冇o左芝士味布丁了!有o的失望呢!

經過4小時多o既時間,我o地終於到達香港國際機場,check out後就去搭巴士,第一個感覺就係好熱,突然間好掛住日本o的又涼又舒服o既天氣。呢o的咁熱咁濕o既天氣就標誌住我o地o既日本之行正正式式地結束了!